ფემინსტრიმის ახალი სეზონისთვის ავტორების შერჩევა იწყება
„ფემინსტრიმი“ განახლებული ფორმატით ახალ სეზონს იწყებს და იწვევს ავტორებს!
ფემინისტური პოდკასტების სერიას "ფემინსტრიმი" ქალთა ფონდი საქართველოში შვედეთის საერთაშორისო განვითარების თანამშრომლობის სააგენტოს (SIDA) ფინანსური მხარდაჭერით აგრძელებს.
პროექტი ემსახურება გენდერული თანასწორობის შესახებ ცოდნის გავრცელებას, ქალთა შთაგონებასა და სოლიდარობას. "ფემინსტრიმი" ავტორებს სთავაზობს არა მარტო პოდკასტის ფორმატს, არამედ ტიკტოკ პლატფორმასაც ფემინიზმსა და ქალთა უფლებებთან დაკავშირებულ სხვადასხვა საკითხზე სასაუბროდ.
ახალი სეზონიდან ვეძებთ ავტორებს, რომლებიც ისაუბრებენ ფემინისტურ აქტივიზმზე, მობილიზებისა და სოლიდარობის ფემინისტურ ალტერნატივებზე, ფემინისტური ცოდნისა და ზრუნვის გავრცელების საჭიროებაზე, მოძრაობათაშორისი გადაკვეთების და მობილიზაციის სტრატეგიებზე და სხვა რელევანტურ თემებზე.
შემოთავაზებული საკითხები შეიძლება იყოს:
-
როგორ იქმნება დღევანდელი ფემინისტური/ქალთა მოძრაობები საქართველოს სხვადასხვა ქალაქსა და თემში;
-
როგორ დაიწყო და რა გზა გაიარა დღემდე ფემინისტურმა აქტივიზმმა - ცვლილებები, გადაკვეთის წერტილები, პარალელები;
-
საპროტესტო მოძრაობის ანატომია - ქალებისა და ქვიარ ადამიანების ხმა;
-
Საკუთარ თავსა და ერთმანეთზე ზრუნვის პრაქტიკები, მათ შორის არსებული კრიზისის დროს - საჭიროებები, დინამიკა და გამოწვევები;
-
მიგრაციის გენდერული ასპექტები - შრომითი მიგრაცია, ეკომიგრაცია, ქვიარ ჯგუფების მიგრაცია და მიგრაციის ფემინიზაცია;
-
ფემინისტური პოლიტიკა - რესურსებზე თანაბარი წვდომა და პოლიტიკური მონაწილეობა ქალებისა და სხვა უჩინარი ჯგუფებისთვის;
-
გარემოსდაცვითი სამართლიანობა და ქალთა უფლება უსაფრთხო, სუფთა და ჯანმრთელ გარემოზე (ექსტრაქტივისტული პრაქტიკები, საკვების სამართლიანობა, ბიომრავალფეროვნება და სხვ.)
კონკურსის შედეგად Შერჩეული თითოეული ავტორი მოამზადებს ოთხ ტიკტოკ ვიდეოს. ავტორებმა უნდა წარმოადგინონ ტიკტოკ ვიდეოების კონცეფცია - რა თემაზე იქნება, ვინ იქნებიან რესპონდენტები (ასეთის არსებობის შემთხვევაში), ვიდეოების ფორმატი და თხრობის სტილი.
ვიდეო მასალა განთავსდება ქალთა ფონდის ტიკტოკის პლატფორმაზე,
პროექტის ხანგრძლივობა: 4 თვე.
ანაზღაურება: თითოეული ვიდეოსთვის 780,61 ლარი (დარიცხული).
დაინტერესების შემთხვევაში, გთხოვთ გამოგვიგზავნოთ ვიდეო (1 წუთამდე), სადაც მოგვიყვებით მოკლედ თქვენ შესახებ და მოკლედ გაგვაცნობთ შერჩეული ტიკტოკ ვიდეოების კონცეფციას შემდეგ მისამართზე: feminstream@gmail.com. თუ მსგავსი გამოცდილება გაქვთ, სასურველია, განაცხადს თან დაურთოთ თქვენ მიერ მომზადებული ვიდეოს (ტიკტოკის ან სხვა) მაგალითი. ვიდეოს გადაღებისა და მისი დამუშავების ხარისხს განხილვის პროცესში ნაკლები ყურადღება მიექცევა. ქალთა ფონდი შერჩეული ავტორებისთვის ჩაატარებს ვორქშოფს ტექნიკური უნარ-ჩვევების გასაუმჯობესებლად.
სათაურის ველში მიუთითეთ: ფემინსტრიმის განაცხადი.
განაცხადის მიღების ბოლო ვადა: 4 აპრილი, 2025.
პროექტის შესახებ დამატებითი ინფორმაციის მისაღებად იხილეთ ბმული: http://womenfundgeorgia.org/ka/News/Feminstream